Аса рақымды, ерекше мейірімді Алланың атымен бастаймын! Барлық мақтау әлемдердің Раббысы Аллаға тән! Ардақты Пайғамбарымызға Алланың салауаты мен сәлемі болсын!
Ардақты ағайын, қадірлі жамағат!
Сіздерді исі мұсылман баласы асыға күтетін, он екі айдың сұлтаны – қасиетті Рамазан айының келуімен шын жүректен құттықтаймын! Алла Тағала осы мүбәрак айда ұстаған оразамызды, жасаған дұға-тілектерімізді, атқарған ізгі амалдарымызды қабыл етіп, баршамызға мол сауаптан жазғай.
Рамазан – жүректің тәрбиесі.
Ораза – ең алдымен жүректің амалы. Рамазан – жүректі тазартуға, ниетті түзетуге, нәпсіні тәрбиелеуге және тақуалыққа жетуге берілген үлкен мүмкіндік. Ауыз бекітудің мәні тек ішіп-жеуден тыйылу емес. Шынайы ораза – көзді жамандықтан, тілді ғайбаттан, құлақты өсектен, жүректі қызғаныш пен тәкаппарлықтан сақтау.
Алла Елшісі Мұхаммед пайғамбар (оған Алланың салауаты мен сәлемі болсын):
«Расында Алла Тағала сендердің бейнелеріңе де, дүниелеріңе де қарамайды. Алайда жүректеріңе және амалдарыңа қарайды», – деген.
Демек, оразаның шынайы сауабы – аштықта емес, тақуалықта. Ас пен судан тыйылу – рухани кемелдікке апарар жолдағы құрал ғана. Негізгі мақсат – жүректі Аллаға жақындату, жан дүниені көркем мінезбен безендіру.
Алла Тағала қасиетті Құран кітабында Бақара сүресінің 183-аятында былай дейді:
«Уа, иман еткендер! Өздеріңнен бұрынғыларға парыз етілгендей сендерге де ораза ұстау парыз етілді. Бәлкім, сол арқылы тақуалыққа жетерсіңдер».
Бұл аятта оразаның басты мақсаты айқын көрсетілген – тақуалыққа жету. Тақуалық – адамның әрбір ісінде Алланың разылығын көздеуі, харамнан сақтанып, адалдықты ту етуі. Рамазан – осы қасиетті бойға сіңіретін рухани мектеп.
Рамазан – кешірім мен мейірім айы.
Бұл ай – Құран түскен ай, дұғалар қабыл болатын, сауаптар еселенетін, тозақ есіктері жабылып, жәннат есіктері ашылатын мүбәрак мезгіл. Рамазан – сабырдың, шүкірдің, мейірім мен кешірімнің айы.
Ораза ұстаған жан аштық арқылы мұқтаждың халін түсінеді. Жүрегінде жанашырлық оянып, қайырымдылыққа ұмтылады. Сондықтан халқымыз Рамазан келгенде ауызашар беріп, жағдайы төмен отбасыларға жәрдемдесіп, үлкендердің батасын алуға тырысқан. Бұл – дін мен дәстүрдің сабақтастығын көрсететін игі үрдіс.
Ұлттық болмыс пен рухани құндылық
Сан ғасырдан бері Исламды рухани тірек еткен қазақ халқы Рамазан айын ерекше дайындықпен қарсы алған. Ауыл-аймақ болып ауызашар жасап, бірлік пен бауырмалдықты нығайтқан. Жастар үлкендерден бата алып, имандылыққа тәрбиеленген.
Бүгінде де бұл игі дәстүр жалғасын тауып келеді. Мешіттерде тарауық намаздары оқылып, Құран хатымдары жасалып, қайырымдылық шаралары ұйымдастырылуда. Бұл – халқымыздың иманға деген құрметінің айғағы.
Рамазан – өзгеріс бастауы.
Қасиетті ай – тек уақытша құлшылық кезеңі емес, өмірлік өзгерістің бастауы болуы тиіс. Рамазан бізге сабырды үйретсе, сол сабыр жыл бойы жалғассын. Бұл айда тілімізді тыйсақ, жыл бойы да жаман сөзден сақтанайық. Рамазанда мешітке қадам бассақ, оны кейін де үзбейік.
Алла Тағала баршамызға осы қасиетті айдың қадірін түсінуді, әр күнін сауаппен өткізуді, шынайы тақуалыққа жетуді нәсіп етсін! Ел аман, жұрт тыныш болып, бірлігіміз бекем болғай!
Қасиетті Рамазан айы баршаңызға құт-береке, мейірім мен кешірім, рухани жаңару алып келсін! Әмин.
