Астана қаласында Қазақстан мұсылмандары діни басқармасының төрағасы Наурызбай қажы Тағанұлы Ирак Республикасының еліміздегі елшілігінің жаңадан тағайындалған уақытша сенімді өкілі Жабер Нажм Абдолла әл-Тәмимиді өз өтініші бойынша қабылдады.
Кездесуде екі елдің түрлі саладағы қарым-қатынасы сөз болды. Бас мүфти Наурызбай қажы Тағанұлы елімізде тұрақты түрде өтіп келе жатқан Әлемдік және дәстүрлі дін лидерлері съезінің дінаралық татулық пен достықты, халықтар арасындағы қарым-қатынасты нығайтудағы рөлін айрықша атап өтті. Сонымен қатар Қазақстан мұсылмандары діни басқармасының жұмысы жайлы баяндап берді.
Басқосу барысында сенімді өкіл Ирак Республикасындағы діни ахуал, мұсылман қауымының тыныс-тіршілігі жайлы Бас мүфтиге әңгімелеп берді. Өз кезегінде Жабер Нажм Абдолла әл-Тәмими Діни басқарманың діни саладағы орны мен рөлі жайлы ойымен бөлісіп, мүфтияттың игі бастамаларына тілеулестік ниетін білдірді. Сонымен қатар уақыт бөліп, арнайы қабылдаған Бас мүфтиге алғысын жеткізді.
