Бүгін Сырым ауданы, Алғабас ауылдық округінде 100 адамға арналған жаңа мешіт ашылды. Қасиетті ғимараттың ашылу салтанатына аудан әкімі Ж.Ж. Батырниязов, ҚМДБ БҚО бойынша бас имамы С.Қ. Алибаев, Батыс Қазақстан облыстық ардагерлер кеңесінің мүшесі Ғ. Құрақов бастаған мешіт ақсақалдары және мешіт салуға атсалысқан демеушілер мен ауыл тұрғындары қатысты. Салтанатты шараны орталық «Ар – Рахман» мешітінің азаншысы А. Асылбеков құран оқумен ашып, Ғұмар ақсақал бата жасады. Мешіттің салынуына бастама көтерген азаматтар мен демеушілік көрсеткен «Бетперде киген адам!» қоғамдық қорына алғыс хаттар табыс етілді.
Жаңа мешіттің ашылу құрметіне орай мешіт ауласында спорттық ойындар (арқан тартыс, қой көтеру, қол күрес) ойнатылып, жеңімпаздарға бағалы сыйлықтар берілді.
Қасиетті жұма күні жұртшылық игілігіне пайдалануға берілген «Алғабас» ауылдық мешітінде бүгін алғаш рет азан шақырылып, жамағатпен жұма намазы оқылды. ҚМДБ БҚО бойынша бас имамы С.Қ. Алибаев «Ислам және отбасы» тақырыбында жұма уағызын айтып, жұма намазын жүргізді.
Шара соңында марқұмдардың рухына құран бағышталып, ас берілді және қонақтар мешіттің ішін аралап танысты.
