Бәйтерек ауданында халал асхана ашылды

2017 жылы Батыс Базақстан облысы, Бәйтерек ауданында  Мәуліт және Тәуелсіздік күні мерекесімен тұспа-тұс жаңа мешіт ашылған болатын. Алла үйінің салынуына атсалысқан Ақжайық өңірінің тумасы, облыстық мәслихат депутаты Мұрат Жәкібаев. Содан бері бос тұрған бұрынғы ескі мешіт ғимараты қасиетті жұмада Қазақстан мұсылмандар діни басқармасының халал стандартына сай келетін  асхана ретінде есігін айқара ашты. Бәйтерек аудандық мешітінің жаңа бас имамы Бағдат Шақаевтың бастамасымен 200 адамға арналған асхана іске қосылды.

Асхананың ашылу рәсіміне арнайы жайылған дастархан басында алғашқы сөз кезегін алған аудан әкімінің орынбасары  Көпжан Тастанұлы жиналған жұртты асхананың ашылуымен құттықтап, аудан халқының қажеті үшін  осындай игі істі қолға алып жатқан жас болсада бас имам Бағдат Русланұлына шексіз алғысын жеткізді.

Келесі кезекте Қазақстан мұсылмандар діни басқармасының  БҚО бойынша бас имамы Мұратбек қажы Қыстаубаев ел игілігіне берілгелі тұрған асхананың тұсаукесеріне  құтты болсын айтып,  Орал медресесінің түлегі, көрші Тасқала ауданының тумасы, білімді азамат, аудандық мешітінің бас имамы Бағдат Шақаевтың еңбегін бағалап, имандық жұмысына сәттілік тілеп, халал тойлар мен игі қуаныштардың көп болуын тілеп, «Бірлік пен ынтымақ» жайында уағыз айтып, жиналғандардың сауалдарына жауап берді.

Бәйтерек ауданының тұрғыны Сәтім ата тұңғыш рет ашылып отырған халал стандартына сәйкес келетін асхананың ашылуына ұйтқы болған бас имам Бағдат Русланұлына ақжарма тілегін  арнап, дастархан соңында дұға жасады.

Игі шараға облыстың имамдары, аудан әкімінің орынбасары Мұрат Дүйсенұлы мен елдің ақсақалдары мен имандары жастары қатысты.

Ақжайық өңірінде халал асханалар көп болғай!

 Нұрлан САМАТҰЛЫ

Пікір үстеу

Э-пошта мекенжайыңыз жарияланбайды. Міндетті өрістер * таңбаланған