232-ші баспана Сырым ауданына бұйырды

«Сырым елі» газеті мен Қазақстан мұсылмандар діни басқармасының Сырым аудандық орталық мешіті баспанасыз жігітке үйдің кілтін табыс етті. «Сырым елі» газетінде Бауыржан Ширмединұлының «Анамды қайда апарамын?» атты мақаласы жарық көріп, сырқат анасы бар,  баспанасыз, карантиннің кесірінен жұмыссыз қалған жігіттің тағдыры, оған баспанаға алуға халықтан көмек қажет екені жазылды. Аудандық газеттің қолға алуымен, халықтың қолдауымен бір аптада 2 млн 246 мың теңге жиналып, газ, су кіргізілген 6 бөлмелі үймен бірге қажетті тұрмыстық техника, жиһаздар, ыдыс-аяқтар алынды.  Мешіт жамағаты үйдің іші-сыртын ретке келтіру жұмыстарына атсалысты.
Бүгінгі қоныстойда «Сырым елі» газетінің директор-редакторы Бауыржан Ширмединұлы ер азаматтың несібесі елге шашылып берілетінін, Алтынбектің несібесі бүгін өз қолына тиіп отырғанын, баспанаға қол жеткізудегі  жүріп өткен жолдарынан хабардар етті.
Елдің атынан сөз алған Сырым ауданы әкімінің орынбасары Асланбек Сарқұлов:
–  Аудандық мешіттің бас имамы Әділхан Наурызбай мен «Сырым елі» газетінің редакторы Бауыржан Ширмединұлының Рамазан айында қолға алған игілікті ісін бүкіл ел қолдады. Осы істің басы-қасында Темірлан Ғаббасов деген азамат та жүрді. Бұл – аудандық газет әперген екінші үй. Бұған дейін «Газеттен жасалған үй» жобасымен Көгеріс ауылынан үш балалы анаға баспана алып берілген болатын. «Сырым елі» газеті елге, халыққа қажетті мәселелерді көтеріп жүр. Аудан әкімінің, барша әріптестерімнің атынан Алтынбек бауырымызды баспаналы болуымен құттықтаймын. Қолдау көрсеткен, қолғабыс білдірген облыстық орталық мешітке, азаматтарға шынайы алғысымды білдіремін. Әрдайым бірлігімізбен, сыйластығымызбен, қамқорлығымызбен көріне берейік, -деген лебізін жеткізді.
ҚМДБ жанындағы «Зекет» қайырымдылық қорының Батыс Қазақстан облысындағы өкілі, облыстық орталық мешіттің найб имамы Самат Әлібаев:
–  Пайғамбарымыз (с.ғ.с.) бір хадисінде былай дейді: «Кім де-кім бұл дүниеде  бір адамның мұқтаждығын өтесе, Алла тағала ол адамды қияметте мұқтаждығын өтейді»,- деген. Аудандық мешіт пен аудандық газет  бастап, бүкіл ел қолдаған  қайырымды істеріңізге Алла разы болсын. Қазақстан мұсылмандар діни басқармасының бас мүфтиі Наурызбай қажы Тағанұлының бастамасымен, «Зекет» қайырымдылық қорының қолдауымен  «Ел үлесі – пәтерге» жобасы бойынша кеше 231 отбасыға үй берілсе,  бүгін міне, 232-ші отбасыға баспанаға алуға  үлес қосып жатыр. Бұдан бөлек түстен кейін бас мүфтидің атынан мұқтаж отбасыларға азық-түлік тарататын боламыз, – деді.
Баспананың кілтін басшылар үйдің иесіне салтанатты түрде табыс етті.
«Nur Otan» партиясының Сырым аудандық филиалының төрағасы Талғат Дарғожиев сөз сөйлеп, қысқа толқынды пешті сыйға тартты.  Үйдің кілтін қолына алған иесі қуаныштан көзіне жас алды. Бұл сәт  жиналғандардың көңілін толқытты.
Қонақтар иесімен бірге үйге кіріп, жаңа қонысқа арналып, құран оқылды.

Сырым аудандық мешітінің баспасөз қызметі

Пікір үстеу

Э-пошта мекенжайыңыз жарияланбайды. Міндетті өрістер * таңбаланған